1. Tatlong pulgadang suklay, kayumanggi ang kulay

Para sa buhok na unti-unting nalalagas at sa anit na madalas mangati. Para sa namumutiktik na uban at makakapal na balakubak. Pangmasahe sa ulong laging sumasakit sanhi ng dahan-dahang pagpanaw ng mga matang naninilaw.

bumalik

2. Dalawang magkaibang tiket sa bus; mula sa magkaibang lugar

Para sa paglalakbay na wala namang tiyak na patutunguhan. Para sa binting gumegewang, nangungulila sa kapareha.

bumalik

3. Isang chewing gum

Para sa pangang hirap ibuka. Para sa laway na napapanis dahil laging nauubusan ng sasabihin.

bumalik

4. Isang sign pen, itim ang tinta

Para sa papeles ng paghihiwalay na kailangang papirmahan kay Nanay. Para sa kamay na namamaalam. Para sa matang hirap lumuha.

bumalik

5. Isang malinis na t-shirt at puting brief

Pamalit kinabukasan kung sakali lang na magpilit ang mga anak na doon na sa bahay magpalipas ng gabi, na madalas na hindi nangyayari.

bumalik

6. Maraming-maraming papel na kailanma'y hinding-hindi ko maiintindihan ang laman

bumalik

7. Isang naninikip na puso

Para sa pagpapaliwanag na naipon lahat sa lalamunan. Para sa paglalambing na hindi nasuklian. Para sa atake ng matinding kalungkutan na kailanma'y hindi na malulunasan.

bumalik

8. Isang garapon ng pighati

Para sa lahat.

bumalik